Քեսապահայութեան մասին` Հայր Վարդան Գազանճեանի զրոյցը «Տէյլի Սթար» ին հետ։
«Տէյլի Սթար» անգլիատառ օրաթերթը իր 3 ապրիլ 2014-ի թիւին մէջ հրատարակեց տեղեկագիր
մը՝ Սուրիոյ Քեսապի շրջանի կացութեան, անոր զարգացումներուն եւ տեղահան հայերու իրավիճակին
մասին:
Տեղեկագրութիւնը կ'անդրադառնայ երեք հայկական կուսակցութիւններու (ՀՅԴ,
ՍԴՀԿ եւ ՌԱԿ) նախաձեռնութեան՝ 1 ապրիլ 2014-ին, երկու ժամ տեւողութեամբ ամէն աշխատանք
դադրեցնելու հայկական հաստատութիւններուն, գործատեղիներուն եւ դպրոցներուն մէջ, առ ի
զօրակցութիւն քեսապահայութեան:
Միեւնոյն տեղեկագրութեան շրջագիծէն ներս, «Տէյլի
Սթար» օրաթերթը հրատարակած է հարցազրոյց մը Աւետման Սրբոյ Կուսին եկեղեցւոյ ժողովրդապետ՝
հայր Վարդան վրդ. Գազանճեանին հետ, որ կը խօսի Հայութեան համար Քեսապի կարեւորութեան
մասին: Ան կը նկարագրէ Քեսապէն տեղահանուած եւ Լաթաքիա ապաստան գտած հայ ժողովուրդին
կացութիւնը, որուն վկան եղած է 29 մարտ 2014-ին Լաթաքիա կատարած այցելութեան ընթացքին:
Ան նշած է թէ աւելի քան 300 հոգիներ կը գտնուին Լաթաքիոյ եկեղեցւոյ հոգետան մէջ, եւ անոնք
կարիքը ունին կենսական պէտքերու: Հայր Վարդան նկատել տուած է տեղահանուած քեսապահայութեան
ծանրակշիռ վիճակը, յիշեցնելով որ այս ողբերգութիւնը կը զուգադիպի Հայոց Ցեղասպանութեան
100-րդ տարելիցի նախօրեակին: